ألحقونا ياجماعة.......... البيت اتشرخ

الأستاذ محمد الأفندى.............. الأفندى دى أسمه مش لقب
موظف فى ديوان من دواوين الحكومة الكتير اللى ما فيهاش لا شغل ولا فلوس
مرتبه بعد 32 سنة خدمة فى شهر يوليو ده 432.55 جنيه وعنده 3 عيال
ساكن فى الشقة اللى كان ساكن فيها أبوه قبل كدة فى حى من أحياء القاهرة الشعبية اللى الناس فيها على قد حالهم وطيبين فى شارع الرضا اللى الحى مجازاً أطلق عليه شارع
الشقة بنى قديم يعنى السقف عالى يجى 3.5 متر
الأوض واسعة والفسحة اللى هى الصالة كبيرة
المهم.....................محمد الأفندى واحد زى أى واحد ممكن تشوفهم فى الأتوبيسات الزحمة الساعة 3 العصر
موظف عتيد يعنى البطيخة والجرنان بس هو بطل يجيب جرايد من ساعت ما غلوها وبقت بخمسين قرش وبطل يجيب البطيخ من ساعت ما يوسف والى حط مرخيره فيه
المرتب يدوب..........يدوب.................
الصبح على غيار ريق
ألحق ياأبو أحمد _ ده ابنه الكبير _ فيه شرخ كبير فى الحمام
مراته بتقوله وهى مخضوضة
فين يا سعاد.........
وجرى يشوف الشرخ
ياااااااااااااه ده شرخ كبير
بس هو مش فاضى يدوب يلحق يروح الشغل
يروح الشغل وهو راجع يعدى على واحد معرفة يعرف أنه شغال فى المعمار
يتفق معاه أنه يجى المغربية يشوف الشرخ.......

الشرخ ده منفد فى الحيطة وبالعرض ده يبقى خطير
قالها الأسطى اللى جابه يشوف الشرخ بلهجة الخبير
طيب أيه العمل
لازم واحد مهندس يشوف البيت كله لأن الموضوع ده مش فى الشقة عندك بس
طيب.............

راح محمد الأفندى لسكان البيت اللى معاه وطلب أنهم يتجمعوا عنده فى الشقة
الناس ما كدبتش خبر
جت وبعد السلامات والسؤال عن الصحة و شرب الشاى فتح الموضوع وحكالهم على اللى حصل وأن لازم نجيب مهندس يشوف البيت
طيب والموضوع ده يتكلف أد أيه
ده سؤال سأله عم عبد الله البقال اللى ساكن فوقيهم
والله مش عارف أحنا نجيب ونشوف
طيب..................

مر يومين ولا حد سأل فى الأستاذ محمد

مر يومين كمان وأبن الأستاذ محمد الكبير -أحمد ما أنتو عارفينه - جاب واحد صاحبه مهندس مدنى لسة متخرج وقدر الموضوع أن البيت لازم يتعمله تنكيس وح يتكلف فى حدود 10 ألاف جنيه

الأستاذ محمد سمع المبلغ ما حطش منطق
حتى ما رضيش يقول لحد من الجيران

طيب وح نعمل أيه ياسى محمد
دى مراته بتقوله بعد أسبوع وهم بيتغدوا
والله ماأنا عارف....................
ربنا يستر

مر شهرين على الموضوع وكل يوم الأستاذ محمد وهو داخل الحمام يقف يتفرج شوية على الشرخ

مر سنة ولسة ما فيش حد عمل حاجة

مر 5 سنين والشرخ ظهر فى شقق تانية وبرضه ما حدش عمل حاجة

المهم علشان طولت عليكم
محمد الأفندى وأسرته والجيران أتعايشه مع الشرخ زى ما أتعايشوا مع الغلا زى ماأتعايشوا مع كل حاجة مش عاجبانا ومابنقدرش نغيرها

ياترى محمد واللى معاه ربنا ح يسترها معاهم لغاية أمتى
وأحنا كمان ربنا ح يسترها معانا لغاية أمتى

يا سيدى أدينا عايشيين
قصدى متعايشين