حوار مع نفسى المحبطة

عندما وجدتها كان هناك من سبقنى إليها
وكعادة البشر فى أفساد أحلى ماخلق الله سبحانه وتعالى ...................أفسد فى جذورها فأنتزع منها التشبث بالأرض والحياة
أفسد فى أعمدة الأساس...............واصبح من واجبى أن اصلح ماأفسده البشرى الذى ينتسب للبشر ظلماً
واجبك!!!!!!
وليه واجبك أنت
مش واجب اى حد تانى
خلاص انت مبعوث العناية الآلهية لأنقاذ محطمى الجذور..........................
ح تضحك على نفسك
انت لا مبعوث ولا بتاع.................أنت طمعان
طمعان فى حاجات كتير
وماله
مااطمع
لا بس ماتعملش فيها أبوعلى
لا ح أعمل
يابنى بطل خيبة بقى وخليك فى روحك.....قال جذور واعمدة قال.....ده انت ملعوب فى جذورك لعب
وماله.....أهو أتلم المتعوس على خايب الرجا
بذمتك ودى تبقى علاقة
اه............بكرة تشوف انا ح اعمل أيه
أبقى قابلنى بعبطك ده
ح اقابلك وبكرة أنا اللى ح أضحك عليك
هع................كان غيرك أشطر............يابنى كله مقفول من كل ناحية زى الدمينو الأمريكانى
ح أهد الدور وح أبتدى من تانى
لا بقى أنتى بايخ
لا انتى اللى محبط
لا انت اللى عبيط
لا انت اللى يآئس
لا انت رزل بقى
لا أنت اللى خيبة الأمل ركباك زى الجمل
لا انت ح تلبخ...............وحياة خالتك لأوريك
ياشيخ روح بقى بلا بتاع
روح انت أجرى بقى
طيب ماشى لما نشوف
ح نشوف

مصر........بضاعة ...........أتلفها الهوى

دخلت جليلة.........محل السيد احمد عبد الجواد بترحاب غامر منه
جاب الشربات للسلطانة.......شالت وحملت طلبات ومادفعتش........أداها السيد احمد كل طلباتها بأريحية وكرم زائد
وخرجت جليلة وهى مبسوطة.......فهى دفعت قبل كدة ثمن الكرم ده
دفعته قعدات أنس وفرفشة و.........................وهوى
جه العامل للسيد احمد..........ياسيد أحمد البضاعة اللى خرجت دى نقيدها أيه..؟؟؟؟؟
أكتب عندك ياسيدى ....................بضاعة.............أتلفها الهوى
شاهدت هذا المشهد كثيراً فتلفزيونا الرائد ضاعت منه باقى نسخ الثلاثية ولم يتبق له منها غير فيلم بين القصرين ووصل أنه كان يعرضه خلاص الشهر مرتين او تلاتة....
دائماً ما يعجبنى تمثيل يحيى شاهين فى دور الرجل صاحب الوجهين.....فهو الرجل الحمش فى بيته بتاع اللهو والمسخرة فى بيوت الدعارة
لكن أصبحت أربط بين هذا المشهد تحديداً وبين ما يحدث فى مصر........
كم فى مصر من سى السيد الذى يهادى جليلة بضاعة ويأيدها أنها أتلفها الهوى
فمن أحمد عز الذى أهدى له أحتكار الحديد أو لساويرس وصحبه الذى أهدى لهم رخص المحمول أو لمشتريين القطاع العام الذين أهدى إليهم صروح الصناعة والتجارة المصرية بأبخس الأثمان
عمر أفندى وشركة الدخيلة وبنك أسكندرية وقبلهم شركة المراجل البخارية وشركات كتير...........أهديت كبضاعة أتلفها الهوى...........
منقصات أنشاء البنية التحتية اللى هارينا زل عليها أهديت لمقاولين من عينة جليلة كبضاعة أتلفها الهوى...........
أمشى فى الشارع وأنتقد سفلته ولا بص على عواميد النور وشوف عدم مطابقتها للمواصفات ولا على الأرصفة اللى بتتكسر من مجرد السير ولا بتتغير لمجرد التغيير ولا .........ولا ولا ولا..............وح تكتشف انها بضاعة اتلفها الهوى
الخلاصة
مصر كلها بقت بضاعة أتلفها الهوى فى محل سى السيد وولده بتهادى لجليلة عز وساويرس وأبو العنين وغيره وغيره نظير.......................الله أعلم بقى باللى بيحصل فى الضلمة
مصر..................بضاعة اتلفها الهوى........لكنه هوى فاسد

لله يازمرى...

مرة من ذات المرات وقف زامر للناى يزمر فى الحى.....وكان يطمع فى مال يعطى له.....فلما ذهب عنه الناس بعد أن سمعوا زمره.....ولم يعطوه.....وقف ليكمل زمره...فمر عليه شخص وسأله عن سبب زمره بالمجان....فرد...
لله يازمرى...
مريت على واحد بيرش مية
بيطرى الجو قدام محله....
وبعبط....لا برزالة....لا ممكن ببواخة
وقفت أشرح له أنه اللى بيعمله ده حرام....وأنه بيهدر مية حرام أنه يرميها كدة على الأرض.....
طبعاً نظر الرجل لى شذراً وكان عايز ياخدنى جوزين أقلام لولا انه لاقانى بكلمه بادب...بس فى الآخر قالى فيما معناه............مالكش دعوة يابارد

ومرة تانية وأنا راكب مع سواق ميكروباس أخد شلن زيادة فى الأجرة وأتكررت كذا مرة قدامى.....فببواختى المعهودة وجهت نظره أن كدة حرام وأن دى سرقة مقنعة....وقعدت افهم فيه انه كدة بياخد حاجة مش من حقه وخصوصاً كمان هى حاجة مالهاش لزمة يعنى الكام شلن اللى خدهم ولا ح ياخدهم طول اليوم مش ح يعملوا فلوس عليها القيمة حتى على المدى الطويل....يعنى ح ياخد ذنب حتى بدون أستفادة مادية حقيقية...فى الآخر نفس النظرة ....مع كلام فيما معناه وأنت مال اهلك انا عايز أخش النار انت شريكى؟؟
المصيبة بقى كانت طامة كبرى.....
لما وقفت أشرح لجيرانى بكل الهبل والعبط... كأن ربنا ادانى كاسهم أوزعوا لخلق الله طمعت فيه وشربتوا لوحدى.... أزاى أنهم لما بيسيبوا البواب يغسل عربياتهم بالمية جنب الرصيف بالخرطوم هو اهدار للمية اللى بندفع فيها كلنا فلوس وكمان بتتجمع والأرض بتشربها وبتتكون مياة جوفية ح تأثر على المدى البعيد على الأساسات بتاعت العمارة...............كلام كتير اتقالى كان بيحمل بين طياته تعليقات غير مسموعة من قبيل ....
أنت عبيط يابنى....
أيه الحقد ده هو انت علشان ماعندكش عربية.....
أجرى يالا ألعب بعيد عننا أحنا مش ناقصينك.....
وأحلى تعليق غير مسموع كان فى عيون جارى اللى تحتى على طول....
وحياة أهلك ماأنا مبطل غسيل عربيتى ولو بمية العمارة كلها بالعند فيك.....

طيب بالذمة انا غلطان كدة
ولا كالعادة
لله يازمرى....

وهل يعيش بعدها لحظة........أشك

عندما قابلها أول مرة لم يرتاح لها وهى لم تعجب به بل نقمت عليه
قفل فى وجهها الطريق مرات عديدة وهى أيضاً لم تقصر فى قفل الطرق مثله
ولكنه فجأة أحس أنها غايته ومراده....فقرر ان يحبها فأحبها وعندما احبها عشقها ولما عشقها وقع فى غرامهاوهى أيضاً لم تقصر فى الحب فهى أصابها العدوى سريعاً ووقعت تحت تأثير سحر كلامه وعذوبة لحنه وصدق مشاعره
جرت معه فى طرقات الخيال وجلسا معاً على شواطئ الاحلام
بنوا فيها بيتهم التى ربوا فيها اطفالهم المنتظرين
رتبوا كل شئ حتى الوان الستائر وزهريات الورد
رسم لها أحلامه ورسمت له آمالها
وتلاقيا وكانهم نصفين أفترقا وعادا أكثر شوقاً للأكتمال
ذهب يخطبها من والدها ..............رفض الرجل رفض قاطع وصادم
فهو فقير وهى من بيت غنى




طيب ونهاية الحكاية أيه
مافيش
ماتت قبل أن تقاتل معه من أجل حلمهم
قصة حب مستهلكة
شوفناها فى لف أسطورى وحبيبى دائماً مع بعض التعديل
لكن بتحصل فى الواقع
أه
امال هم جابوها منين
خيال مؤلفين ولا خيال واهمين
يلا بلا حب بلا خيبة
هو الواحد لاقى ياكل علشان يحب
عشانا عليك يارب

دماء على سطح القلب

بكل بساطة تتركك
وبكل برود تذبحك
وبكل جرأة تقول لك انك لم تكن تمثل إليها سوى حالة من الضعف
وكأن ما كان لو يكن.............وكان أحاديثها معى كانت حلم ليلة صيف اتقلب فيها مسهد أنتظر وأفكر
كم حلمت وكم بنيت وكم تخيلت وكم وكم وكم..........
والعجيب أنها عندما ذبحتنى بسكين واقعيتها المزعومة تطلب منى ألا أصرخ .....وتطلب منى ان أتألم فى صمت.....فصوت ألمى يزعج ضميرها
وقررت أن أرد لها الذبحة خنجر مسموم
ولكنى تراجعت ليس لشئ أكثر من ما ينبض بين جنبى..............فهو لازال يحبها
ولعله يحبها أكثر وهى تذبحنى ويعشقها أكثر وهو تريق دماء قلبى على سطح واقعيتها
صرخت بعالى الصوت وتألمت بصراخ يهز الكون ولا يهمنى أن كانت تسمع أم صمت أذنيها ................فعلى الأقل صرخت ونفست بخار ألمى

أيام يظن الأنسان منا أن الدنيا ضحكت له بعد عبوس وأدارت له وجهها بعد أن أدارتها عنه وانه مقبل على سعادة لا نظير له فى حياته فيطلق العنان لآماله واحلامه وتخيلاته ولكنه لا يحسب حساب الطرف الآخر الذى يتعلل بالظروف ويضعف أمام الشدائد ويقف حائر أو يمثل الحيرة لأنه ببساطة لم يكن يكن لك سوى بعض الأمتنان لحبى له وهذا الأمتنان لا يقدر على الوقوف أمام المواجهات ولا يصمد امام المحن

أكاد أجزم بخسارتها وأكاد أيقن بسوء أختيارها ولكن لا أتمنى لها سوى الخير ولا أتمنى لها ماأكاد ان أكون متأكد منه


تجربة نعيشها لنتعلم والتعلم هنا يكون ثمنه دماء تراق على سطح القلب

مذكرات محب فاشل
تكه خيبة
حد يحب فى الزمن ده
يروح يشوف له موتة

الحمد لله الواحد مش ناقص حب وفشل...........اللى فيه مكفيه

وكمان مرة الخيبة................3

أخذ جميع حكام مصر عبرة من خيبة المصريين
فهم لم يجندوا المصريين فى الجيش فى كل الحروب التى خاضوها ولم يمسك المصريين فى أى وقت سلاح يدافعوا به عن وطنهم
حتى فقد المصريين الثقة تماماً فى جدوى حكمهم لأنفسهم
ظل المصريين منذ عهد الفراعنة يتنقلوا زى الورث من حاكم أجنبى للتانى على أختلاف أجناس الأرض
حتى ان المؤرخين يصفوا الشعب المصرى أنه الشعب اللى حكمه كل أجناس العالم
فمن فرس لأغريق لرومان لعرب حتى المماليك اللى كانوا من كل بقاع العالم حكموهم
واخيراً
وقعت مصر فى أنياب الدولة العثمانية
حاجة طويلة فى التاريخ
دخل العثمانيين مصر فى عام 1517 وظلوا فيها حتى أزاحهم محمد على فعلياً فى عام 1805 وأزاحهم الأنجليز رسمياً فى عام 1914
العجيب أن الزمن الطويل ده ماحركش غير ثورات محدودة بالطعام
لم يحدث أن ثار المصريين على حاكمهم غير مرات معدودة على مر تاريخهم الطويل
حاجة غريبة
بقى شعب حضارة مش عارف كام سنة ميتين كدة فى نفسهم
مش حاجة عجيبة................لا دى حاجة خيبة
نرجع تانى للمماليك اللى أفتكروا أن مصر تركة سابهلهم أجدادهم الغير معروفين وهاتك ياطحن فى خير البلد بدون مناسبة والمصريين كالأيتام على موائد اللئام
ودخل العثمانيين وتحالفوا مع المماليك لحكم البلد بنفس الطريقة ونفس القسوة الغريبة ودخلت مصر فى أظلم عصورها حتى أن كتب المؤرخين لم تستطع أن تتحدث عن هذه الفترة بدقة إلا من بعض اللمحات...........
وجاء نابليون فأيقظ الشعب من سباته وقدر الشعب أن يقلق مضاجع الفرنسيس بثوراته
بل ان الحملة الفرنسية لم تستطع أن تبسط نفوذها على صعيد مصر طوال فترتها التى استمرت لـ 3 سنوات
وتكونت زعامات من الشعب وكانوا نعم الزعماء الذين وقفوا امام الأحتلال وامام المماليك والوالى العثمانى خورشد باشا بعد جلاء الفرنسيس
لكن يال العجب
سلموا مقادير مصر مرة أخرى لحاكم أجنبى بعد ان قدروا مرة ياخدوا زمام الأمور
طيب ليه ماكانش عمر مكرم مثلاً هو الوالى
فيه تحليل بيقول أن لو كان مصرى تولى الحكم كان باقى الزعماء ح يكيدوا له ويتنازعوا معه الحكم
طيب بالزمة دى مش خيبة
جايبين حكم محايد زى ماتش الأهلى والزمالك وأحياناً الأسماعيلى
زامر الحى لا يطرب والشيخ البعيد سره باتع
والشيخ المرة دى كان من ألبانيا
وسره كان باتع قوى
أول ما مسك خلص على اللى فى سكته من أول الزعامات الشعبية حتى اللى فاضل من المماليك ماسابش حد خلص على الكل
مش بقولكم سره باتع....................
أنا نطيت نطة كبيرة على اللى حكم مصر هو وأسرته مدة وصلت لحوالى 150 سنة
لكن الغريب والمتابع أن المصريين طوال الفترة دى ماحاولوش ولو لمرة أنهم يثوروا على أى حد منهم.......حتى لما حصل أيام عرابى
كانت الثورة للمطالبة بالمساواة بين الظباط المصريين والظباط الشراكسة والأتراك لكن الموضوع وسع منهم وكانت النهاية المعروفة والمأساة العرابية التى وصل بالمصريين بعدها بأتهام عرابى بالخيانة لأنه خرج عن الحاكم
فيما عدا الواقعة دى مافيش أى حركة حصلت من المصريين المستسلمين لحكالمهم على طول الخط
وجاءت ثورة 19 التى كانت اليقظة التى أنتظروها طويلاً
وزى ما قال سعد مافيش فايدة
فعلاً ماكانش فيه فايدة
رجعت الغفوة المرة دى بس مع اول حاكم مصرى منذ عهد الفراعين
محمد نجيب اللى ما قعدش فيها غيرسنتين إلا
وطبعاً اللى جه تعرفوه أكتر منى
ولازلت الخيبة مستمرة بنجاح ساحق

تابع الخيبة

ذهب الفراعنة..............
ومضى معهم آخر عهد المصريين بحكم مصرى من بنى جلدتهم
فمن قمبيز إلى الأسكندر والبطالسة إلى يوليوس قيصر الذين ملكوا ربوع مصر وأمتصوا فى دمائها..............
يمر الوقت والزمن وتأتى أجيال و بشر والمصريين تاركين أنفسهم فى أحضان الغزاة بل يتنقلوا من حضن لآخر..........

مصر مقبرة الغزاة

مكتوبة كتير فى يفت على الطريق وخصوصاً لما الواحد يمر جنب منطقة سيادية
ولكن الواقع والتاريخ أن مصر إن كانت مقبرة للغزاة فده علشان الغزاة قعدوا وفرشوا وكلوا وشربوا ومصوا الدم ولما جاء هادم الملذات ومفرق الجماعات .... فبالمرة دفنوا فيها..........
خيبة.................
مافيش حضارة ناشئة قامت فى العالم إلا وأخذت من مصر جانب
فمصر كانت من نصيب الفرس مرة ومن نصيب الأغريق مرة ومن نصيب الرومان طويلاً
وجاءت الحضارة الأسلامية التى ضمت مصر لها .........
ومر عصر الأسلام الجميل والخلفاء الراشدين وأتى زمن الخلفاء الملوك ومصر هى درة تاجهم والمصرين تحت حكمهم
لم يفكر مصرى فى حكم بلده ولم يفكروا أن يطوروا أنفسهم ويعودوا حضارة متحكمة كما كانوا أيام الفراعين
قاعدين مستنين حاكم يأتى على حصان ليجلس على كرسى الحكم كما تنتظر سعدية عريسها اللى ح يجبهولها أبوها
مش مهم مين وشكله أيه ولا بيعمل أيه
المهم ح يجى ياخدها على الحصان ويحكمها
فمن حكم الأمويين لحكم العباسيين لحكم العبد الخصى ...الأخشيدى عارفينه
يمكن لو بتوع جينس خدوا بالهم يحطونا فيه بصفتنا الأمة الوحيدة فى التاريخ العالمى اللى حكمها عبد طواشى.........
فين بقى المصريين فى الموضوع ده
دورت عليهم فى كتب التاريخ
مالقتهمش............الخيبة بتزيد........واخدين بالكم
طول عمر مصر سنية معتدلة تحب آل البيت وتحب الصحابة وتحترم الأعتدال .....لم ينمو فيها أى بذرة للتطرف.....
لكن ببساطة شديدة جاء لها حاكم شيعى.............لا مش شيعى وبس
ده من أكثر فروع الشيعة تطرف.........أسماعيلى
مصر بقيت شيعة ..........وبس
كمان
أه والله
طيب فينك يامصرى
لا حياة لمن تنادى.............ماهى قبل كدة خلت المتنبى يقول عنها
وكم ذا يامصر بك من المضحكات ...........ولكن ضحك كالبكا
ونبص بقى على الجماعة اللى بيسموهم الفاطميين............ندور تانى على موسوعة جينس لتسجلنا كأول أمة فى التاريخ العالمى اللى حكمها مجنون جنان رسمى -طبعاً إذا أعترفنا بأن السمعة اللى طلعت عن نيرون ما كانتش حقيقية زى ما قالوا- فاكرين الحاكم بأمر الله...........بتاع الملوخية
طيب ياجماعة....يابشر ..... ياأمة
ولا حد هنا........عادى خالص كله مطنش على الآخر
كله قاعد مستنى اللى الهوى يرميه على شط مصر وهووووب بقى حاكم
وتعالوا بقى على خيبة الخيبة............
فاكرين فيلم وا أسلاماه
شجرة الدر أتضربت بالقباقيب
وأيبك أتقتل قبلها ومن قبله أقطاى
كل دول على فكرة عبيد....بندلعهم ونقول مماليك .....فينك يا عم جينس سجل دى كمان أول أمة يحكمها العبيد ويتحكموا فى الأحرار
ماعلينا..........
لما نحب نكلم شعب مصر نكلم مين...............
هووووووووب ........نط عم قطز.....تقدر تكلمنى أنا
ميغة.....شئ بلا صاحب
بلد خالية ممن يحكمها ولا كأن ليها شعب ولا ناس ولا بشر مستنية واحد من برة
مستنية المستورد لأن المحلى مضروب
مضروب أيه...........مضروب خيبة
وتبدأ فترة طويلة مرهقة فى تاريخ مصر فى ظل حكم العبيد تأرجحت فيها من العالى للواطى من حاكم قوى....... لحكام ضعاف من ظالم .....لعادل
فينك ياعم الشعب
الخيبة طالت
وأنت رايح فى سابع نومة
ولا حد هنا أصلاً.............يلا أهو تااااااااااااريخ الخيبة
تابعوا معنا

خيبة .........بالـ.....ويبا

خايب......مصرى خايب
طول عمرى خايب....وخايب لأنى فى بلد الخيبة
خايب من الخيبة
خايب ....يخيب ....فهو خيبة
وخيبة دى يعنى خيبة الأمل اللى كتير بيحكوا عنها أنها راكبة جمل
مش عارف أشمعنى جمل هل من باب السجع أم أن الجمل مخصص لركوب الخيبة
فهذا البعير 7 خيبة وتلك الناقة 4 خيبة بس
طيب ليه مش حصان مثلاً ولا كارتة أو حنطور
خيبة الأمل حاجة مش جديدة على المصريين منذ قديم الأزل
خابت آمال المصريين طوال زمانهم المديد الذى يقال أنه يمتد لأكثر من 7000 عام
فمن أول الفراعنة اللى بنوا الأهرامات والحضارة القوية ولكنهم خابوا خيبة ماخبتهاش أم السعد الأرملة أمام مصلحة التأمينات الأجتماعية عندما تركوا شرزمة من البدو الرعاة القادمين من الحدود الشرقية يحتلون بلادهم ويسكنوا على أنفاسهم فترة تزيد عن الـ 300 عام وظلوا فى حالة الخيبة العبيطة التى لاتجد كتب التاريخ تبرير لها .........إلا أنى أظن هو بفعل وباء الخيبة الذى أستوطن مصر المحروسة منذ قديم الأزل...............
ولأنه وباء أو بكتريا أو فيرس كأنفلونزا الطيور فهو من الممكن أن يصيب البعض ولا يصيب البعض الآخروالبعض يشفى منه........فخرج أحمس بن كامس من فترة النقاهة ليحارب الهكسوس ويطردهم.........ولكن لم يطرد معهم الخيبة من أنحاء مصر المحروسة فقد أستوطن هذا البلاء فى تربتها
ويأتى بعد ذلك زمان يبرر فيه علماء التاريخ والمؤرخين خيبة المصريين أن السبب كان أستخدام الهكسوس للعجلات الحربية بينما لم يكن يعرفها المصريين فى حينها
طيب بالذمة ده كلام...............
يعنى عجلات حربية تسبب أحتلال مصر لوجهها البحرى
ولو نفرض
هل كان يحتاج المصريين لأكثر من 300 عام لأكتشاف هذا السر الحربى الخطير ونقله لهزيمة الأعداء...............
أنها فترة خيبة ويأتى بعدها خيبات كثيرة
أنه داء مصرى قديم............خيبة بالويبة
إلا حد يعرف يعنى أيه ويبة؟؟؟
تباعوا معنا.................

صبح الخير ياجارى ........ياسر الفنان

شخص غريب الأطوار

تجده كثيراً ما يصيح بعالى الصوت

المصيبة أنه فاكر نفسه زعيم..........كثيراًَ ما أراه مرتدى بدلة غريبة يعتقد أنها بدلة ظابط ويعلق عليها الكثير من أغطية الكازوز على أعتبار أنها نياشين

أصادفه فى صعودى وهبوطى فهو جارى الباب فى وش الباب وهو مرتدى نظارة الشمس صباحاً ومساء لا أعرف مايعجبه فى هذه النظارة الرخيصة التى تباع فى أردء الأسواق بـ 3 جنيه واحياناً تجدها مكسب فى أكياس الشيبسى...............أظنه يدارى بها نظرات يصوبها للنساء

لا أعرف ماهو سبب تسميته بالفنان إلا إذا كان العك والشغبطة التى يتحف العمارة بها كل قليل يعتبره من باب الفن...............

أسمعه يصيح فى وجه البواب المسكين كانه يامره بالهجوم على العدو وأحياناً كأن البواب أسير حرب لديه وأحياناً أخرى كأنه عسكرى تحت قدميه............لاتسمح نفسه بدفع أجرة البواب لأعتبارات سلطوية حيث يعتبر نفسه صاحب سلطة وصاحب السلطة لا يدفع

أجده فى أجتماعات مجلس إدارة العمارة يعدنا بالحديث مع رئيس الحى لتخليص مشكلة ما أو الحديث مع المحافظ لجلب منفعة للعمارة أو التوسط لدى مدير الأمن لتعيين حرس بسلاح على باب العمارة أو انهاء مشكلة تجنيدية لأبن أحد الجيران عند قائد الجيش

وبالطبع كله كلام أبن عم حديت

أذكر موقفه عندما سرق أحد المنازل فى العمارة وهو يرفع تليفونه على أذنه ويتحدث مع وزير الداخلية شخصياً ...........لأجد تليفونه عندما نسيه وراءه أنه بدون عدة داخلية أساساً

مصاب بجنون العظمة

ياويله اللى ما يبتديش معاه الكلام بلقب ياسر بك أو باشا ساعتها ستجد إعصار من البذاءة يدخل فيه منطقه ...........ده كل الشحاتين فى البلد بقو بهوات وبشوات وانا اللى أستحقها عن جدارة محدش يقولهالى؟؟؟؟؟؟؟؟؟؟

اللى نفسى أعرفه أزاى شحات زى ده سكن فى العمارة الغالية دى...............

صباح الخير ياجارى ..................... ناصر القوى

تروح لعمك أحمد وتوصيه على 4 عربيات بكرة لنقل البضاعة

بس قوله بحمار مش بحصان................

ده كان أمر من الوالد أيام عملى معه منذ 20 عام فى الميناء للتوصية على عربات كارو لنقل البضائع داخلا لميناء حيث كانت وسيلة نقل رخيصة ومسموح بها أيامها..............

تليفون للحاج أحمد

حد يروح يندهله.................أحمد مقاول الكارو تطور مع الزمن وأصبح مقاول نقل بالسيارات فى أوائل التسعينات...............وأصبح يمتلك مكتب مجاور لوالدى ولكنه بدون تليفون ...............

أسكن فى العمارة فى 95 لأكتشف أن أحد جيرانى هو ناصر أبن الحاج أحمد

شقة فى منتهى الفخامة وتحتوى على أثاث غالى جداً يركب سيارة GMC 4×4 تساوى حوالى الثلاث أرباع المليون ..........................

من أين له هذا.................هذا من فضل ربى

ناصر الذى يقاربنى فى السن كان كثيراً ما أجده يتحدث معى ويحاول عقد صداقة أيام الفقر

اليوم لا يكلف نفسه كثيراً برد السلام ناهيك عن إلقاءه أساساً

فى أجتماعات مجلس أدارة العمارة كثيراً ما يعرض أموال وخدمات نفرح لها جميعاً

ولكن فى الحقيقة هو بيقول كدة من باب الفشخرة ليس إلا

لأن عند المطالبة بما وعد فهو يهرب بصنعة لطافة

الجرس يرن عندى

البواب ينتظر فى الخارج

الحاج نصر عايز حضرتك تحت...........

ليه خير

بيقول ان المية من عندك بتخر عليه

نزلت مسرعاً لعنده لأعرف حكاية المية........لأقيت موشح طويل أتفتح بيقول فيه مامعناه أن المية اللى بتخر من عندى بوزت له ديكورات تتكلف تمنى انا وعيلتى

تحليت بالصبر والحلم.........وطلبت منه رؤية المياة التى تخر.........أدخلنى إلى حيث يشكو فوجدت بضع قطرات من المياة ناتجة عن تعرق الحوائط وعندها أنفتحت...............والشاطر يسكتنى

فى الصباح

وجدته قد شكانى لبعض الجيران وجاء من يتدخل لحل المشكلة

وسالتهم عن طلباته

قالوا مطلوب منك تصلح الحمام عند وتغير المواسير وتغير الأرضية

يعنى حسبة 5000 جنيه

قلت لهم هو اللى متضرر من شئ بسيط ما يستحق كل ده ولو عايز يعمل اللى بتقوله ده هو اللى يتحمل التكلفة ....................

كان رده انا البحر يخر عندى ولا اتحمل جنيه واحد عنده

قلت لهم وانا فى غاية الشكر كدة الموضوع خلص....................

صباح الخير ياجارى.................وردة هانم

رن جرس بيتى ففتحت وكنت أقيم بمفردى

شاب فى العشرين يبدو عليه أنه خجول بشدة

حضرتك..............أأأأ ........ ممكن أستعمل التليفون

أتفضل..................

أحضرت له التليفون من الداخل أجرى به مكالمة سريعة كانت يبدو أنها موعد غرامى

شكراً

ماأتعرفتش على حضرتك

أنا محمد اللى ساكن فى التالت أبن مدام وردة

بس أنا أعرف حضرتك كويس ............

طيب لو ممكن سؤال بايخ ......أشمعنى تليفونى أنا اللى فى الخامس وأنت فى التالت

بجد أنا أستذوقت حضرتك وقلت أنك مش حتكسفنى

ولا يهمك.........أى وقت تحب تتكلم انا تحت أمرك

لا بس التليفون عطلان وح يتصلح على بكرة بكتيره......................

مر وقت على هذا الموقف صادفت محمد أكثر من مرة ودار بيننا بعض الأحاديث التى وضح منها انه يحب الرسم والقراءة مثلى...................

يوم آخر................رن الجرس لأجد محمد يطلب أن نتحادث لو أنا فاضى

أدخلته وجلسنا نتحدث فى بعض أمور الثقافة بشكل عام

ولمح محمد بعينه تليفون محمول قديم موضوع فى شاحنه

كانت هذه القصة فى عام 99 حيث كان التليفون المحمول عملة نادرة

هو حضرتك عندك محمول؟؟ سألنى بشغف

أه ...............بس ده مش بتاعى ده قديم وبدور له على بيعة

بجد ..............وحضرتك عايز تبيعه على كام

ليه هو أنت ح تشتريه................

لا دى ماما عايزاه..............ممكن أخده أفرجه لها

أتفضل.................ودى كانت آخر مرة أشوف فيه المحمول المأسوف على قدمه

مدام وردة موظفة ببنك............مطلقة من أمين شرطة ولها ولدين..............حاصلة على دبلوم تجارة

تزوجت مدير الفرع الرئيسى للبنك فرقاها حتى أصبحت مديرة قسم بالبنك بالرغم من مؤهلها المتوسط

فى رحلة البحث عن حقى المفقود لديهم حصلت على 100 جنيه بالعافية بعد مباحثات ومناورات لأكتشف أن الأسرة فيها حاجة غلط.................

زعيق فى الدور الثالث صحى الجيران الساعة 2 صباحاً

تجمعنا لنرى ما يحدث

وجدنا مدير مكتب ملاحى فى العمارة يمسك بشاب هو أخو محمد والأبن الأصغر لمدام وردة ويتهمه بسرقة خط التليفون الخاص بالشركة واستعماله لفترات طويلة وأنه شك فى سرقة الخط بعد وصول الفاتورة بمبلغ مهول فرتب كمين لسارق الخط وامسك باللص الصغير...................

وتعالت صيحات الجيران كلاً يتهم الشاب بسرقة خطه خلال فترة سابقة................

بالكاد منعنا الرجل من إبلاغ البوليس وتفاهمنا مع مدام وردة فى تحمل ربع فاتورة التليفون للرجل الذى وعدته بالدفع خلال أسبوع ولو تفى بوعدها............................

مدام وردة هى الساكن الوحيد الذى لا يدفع مصاريف الصيانة للعمارة بل ولا تدفع حصتها من فاتورة المياه و تشعر بالفخر لذلك ..............

كانت تمتلك سيارة متوسطة الحال قديمة............

عندما تزوجت ورقت فى البنك تحولت لسيارة متوسطة جديدة

ثم سيارة فوق المتوسط

ثم سيارة فاخرة

كالعادة أثارت التسائل حول مدى مقدرتها المادية على أمتلاك سيارة فاخرة تتجاوز الـ 120 ألف جنيه وهى موظفة فى بنك

وكانت الإجابة عندما جاءت مباحث الأموال العامة للقبض عليها مع زوجها..............

صباح الخير ياجارى.................محمد رأفت النمر

نجم المجتمعات وداعى الكبار للحفلات

لم أراه قط إلا بالبدلة الكاملة آخر شياكة

سيارة مرسيدس زلمكة بنمرة 3 أرقام

موبايل آخر موديل يوم ما كان الموبايل هو مقصور على رجال الأعمال فقط

يتحدث دائماً بالملايين ولا يتحدث قط إلا بدفعت أو أشتريت

شركة مهولة لتموينات السفن ووكيل لشركة زيوت مواتير كبيرة

مسئول عن تموين السفن البانكر_ الوقود والزيوت وخلافه – عقارات ومكاتب وشقق

ولكنه مريض بأفة تسرق كل هذا من أغنى شخص

أنه مريض بمطاردة النساء............وتستطيع أى أمرأة أن تضحك عليه وتأخذ منه ماتريد وهو يسيل لعابه كالمراهق بالرغم من أنه فى سن الـ 45 عام تقريباً

كثيراً ما تجرأ بالمعاكسة لنساء جيرانه وعرض عليهم عروض مشينة وكان الرد كثيراً مايكون فضيحة وقليلاً ما يكون أستجابة لغرض أستغلال العبيط المذكور اعلاه ليس أكثر فهو أن كان غنى إلا أنه كان فقير فى الشكل وأسلوب الحديث

وفجأة

بيعت السيارة

وأغلقت الشركة

وجاءت الحكومة تبحث عن النمر بك

ولكنه كان فص ملح وذاب............

كان يسكن فى دور كامل بمفرده...........بدأ عمدة الجن وهو بالمناسبة أخوه فى تقسيم هذا الدور وتأجيره مفروش وأكتفت أسرته بشقة واحدة فقط

وأخذ الناس تمصمص شفاهها وتتحصر على الثروة الضائعة وتأخذ العبر من أخرة الجرى ورا النسوان وخصوصاً وحال أسرته أصبح غير الأول ....................

وفجأة مرة أخرى

ظهر النمر بك

وكأن لم يحدث شئ

أستفاد من المهلة المعطاة من الحكومة لتسوية ديونه للبنوك وظهر مرة اخرى بكل أمان وسلام

والعجيب أنه لم يخسر اى شئ.................كله كان متدكن وسيل الممتلكات وشال الفلوس تحت البلاطة والديانة.................

ليك وح تاخد............فين وأمتى.................معرفش

صباح الخير ياجارى.................بسبس هانم

عند اول نظرة ستتأكد تمام التأكد ان سليلة أسرة محمد على قد سكنت فى عمارتنا وأصبحنا جيران لبرنسيسة من برنسيسات مصر الغابرة

ولكن عند التحدث معها ستعرف أنها هربت من سجن القناطر للنساء بعد أن قتلت زوجها وأذابت جثته فى ماء النار

تناقض مهول بين الشكل والكلام...............ولا يضارع هذا التناقض سوى السلوك

سلوك يحمل كل معانى التكلف والتمثيل فنجدها تقف توزع لحمة مزبوحة على الفقراء فى يوم وهى تمثل التقى والورع والصلاح ولكنها تفلت منها مايكشف التمثيلية عند نهرها لسيدة عجوز أو منعها لفقير يحتاج لأن شكله لا يعجبها

ماعلينا

لا اجد لها زوج على مر سنين سكنتى فى العمارة ولكن كنت أجد لها رجل كل فترة نعرف انه زوجها ليتغير كما تغير كعوب حذائها البالية.............

وأخيراً وجدت رجل يصعد معها فى الأسانسير وبالتدقيق فى ملامحه وجدت أنه صديق قديم وزميل دراسة

وبعد السلام والتحية عرفنى بزوجته بسبس هانم..................

صباح الخير ياجارى.................الأستاذ خليفة خلف خلاف

أتصل بى فى يوم

أنت ما عزمنتنيش على فرحك

لكن انا مش غريب

وح اجى.....................

قلت له تنور.............بس كنت ح أفرقع من الغيظ

العلاقة بينا عمرها ماتعدت صباح الخير

أول أجتماع أحضره لأتحاد ملاك العمارة كان متواجد بشدة فيه وترك كل المشاكل التى تناقش فى الأجتماع وتمسك بمسألة عبيطة وشتت انتباه الجميع بها............وعندما اتفقنا على قرارات كان هو المخالف الوحيد عند تنفيذها بالرغم من موافقته عليها خلال الأجتماع

لم اترك فرصة لأهرب من الحديث معه ولم اغتنمها ولكنه لم يكن يعطينى هذه الفرصة كان يمسك بى كالفأر الذى وقع فى المصيدة وهاتك ياشكاوى واعتراضات

الأستاذ خليفة عمره ما عجبه حاجة ولا وافق على حاجة

على طول معارض

بالرغم من أننا ابدينا استعدادنا لتوليه هو رئاسة مجلس إدارة أتحاد الملاك لكنه كان يرفض بإصرار فهو بتوليه هذا المنصب سيحرم من هواية محببة لنفسه وهى المعارضة والمعارضة بشدة والمعارضة بجميع أشكالها صادفته يوم يعنف البواب على شئ

وكالعادة هربت من لقاءه

ولكنه أمسكنى كالعادة أيضاً

تصور الراجل الواطى ده مش عايز بغسل العربية..........

ليه هو أنت مش بتديله أجرة الغسيل

وأديله ليه...............ماهو بياخد منى كل شهر 10 جنيه.............

كل ساكن فى العمارة بيدى البواب ما بين 20 لـ 30 جنيه لزوم تلبية الطلبات وحمل الزبالة من امام الشقق ومسح السلم حيث أن مرتبا لبواب هو مرتب رمزى 75 جنيه وهو يعتمد على هذه المبالغ كمرتب له

ينهرسود

أنت مابتدلهوش غير 10 جنيه وعايز يغسلك العربية كمان........أنا قلت فى سرى لأنى لو كنت قلت فى علنى ماكنتش خلصت منه ومن تعليقاته المعارضة من شاكلة أهو كدة بطمعوا الناس اللى زى دى

لا ياأستاذ خليفة مالوش حق وانا ح أكلمه....................

صباح الخير ياجارى ........................صبيح

رجل محترم فى السبعينات من عمره

اراه صاعد فى السانسير المجاور حيث يسكن فى الأدوار الزوجية يحمل مستلزمات البيت

يعمل مديراً لأكبر مصانع الزيوت فى منطقة شمال خليج السويس " العين السخنة "

فى غاية الأدب والذوق والأحترام

أصابته وعكة صحية منذ سنوات قريبة جعلته يهتم بالسير على قدميه لمسافات حتى يستعيد صحته بالمشى

حتى أنه خس نصف وزنه بسبب هذا المشى

بالرغم من خروجه على المعاش من سنين كالمفروض إلا أنه كما فى معظم دواووين الحكومة يقلدها القطاع الخاص ويستعين بالكفاءة العجوزة وكأن الشباب معناه قلة الكفاءة

ماعلينا................

يمتلك هذا الرجل سيارة من فئة متوسطة وأن كانت جديدة

بينما تمتلك زوجته أحدث سيارة يستطيع هذا الرجل بكفاحه ومرتبه أن يوفرها له

وان كان هذا الرجل هو قمة فى الذوق والأخلاق والأحترام إلا أن زوجته العجوز المتصابية على العكس تماماً ويزيد عليها التكبر اللا مبرر

حدث بيننا موقف لا أنساه

حين كنت أشغل مأمور الأتحاد................وتعطلت ماتورات المياه وخزينة الأتحاد خاوية

ولم يكن امامنا حل سوى أن نجمع فلوس من السكان

وجاء البواب وهو على وشك البكاء..........محدش معبرنى يابيه وعايز يدينى حاجة

طيب سيبهم وخلى المية تقطع على راسهم.....................

طيب وأنا وولادى ما المية ح تقطع على راسى أنا كمان؟؟؟؟؟؟؟؟؟؟؟؟؟

كان لابد من حل ايجابى

تعال ياعم – البواب – ومريت على سكان العمارة شقة وراء اخرى

وبالطبع كان وجودى يسبب أحراج وهنا تظهر الفلوس المستخبية اللى كانت مش مطلوب غير 20 جنيه يتيمة

وجاء دور شقة المهندس صبيح

وفتحت زوجته الباب

أبتسمت أبتسامة واسعة وتصنعت اللطافة وعرضت عليها المشكلة وطلبت المشاركة بالمال

وهنا فتحت أبواب جهنم...................

سمعت مالا يمكن أن أسمعه وتحدثت معى كأنى عامل لم الزبالة وليس مأمور الأتحاد

الدم على فى عروقى وقررت عمل محضر فى القسم حتى أرد أعتبارى الذى أريق امام البواب وامام نفسى من قبله...........................

وعند باب القسم الذى لايبعد سوى مائة متر عن العمارة وجدت سيارة الباشمهندس صبيح تجرى وتتوقف أمامى ويخرج منها الرجل وهو يكاد يبكى ويتوسل...................

لم يكن امامى سوى الرضوخ لطلب الرجل الكوبارة بتناسى الموقف وقبول الأعتذار منه بالنيابة عن زوجته.............وتبريره بأنها فى حالة نفسية عصيبة فى هذه الفترة

وتانى يوم وجدت اعتذار مكتوب ومعلق فى الأسانسير لشخصى من الرجل المحترم بالرغم من انى لم أطلبه............والعجيب!!!!!!!!!!!!!!!!!!!!!!

أنى بعد يومين وجدت زوجته كتبت على الأعتذار بقلم جاف

أنا مغلطش علشان أتأسف .................

ولا يهك ياست.............أنا اللى حثالة!!!!!!

صباح الخير ياجارى..........................عمدة الجن

ساكن فى الدور الآخير من العمارة

يصعد معى فى الأسانسير وهو يحينى بتحية كلها ليونة وميوعة لا أعرف سببها وأن كنت عرفت السبب بعد ذلك..................

أزيييييييك ياكابتشن ياأستشااااااااذ

يعمل ................لايعمل

لا اعرف له عمل بالتحديد

أحياناً سمسار واخرى تموينات سفن واخرى بتاع كله

لكن الواضح انه لا يجيد أى عمل يقوم به

ولكنه مثل كل سكان العمارة يشترك معهم فى الغنى الغير مبرر

طفت على السطح أشاعة وترددت بقوة

وجاء صديقى رئيس مباحث الأداب وطلب منى المساعدة فى ظبطه متلبس.....................

نعممممممممممممممممممم

متلبس بأيه بس يا أتش......

يعنى انت مش عارف؟؟!!

لا موش عارف

يعنى ما تعرفش ان عمدة الجن .....................

يابنى أنت كمان صدقت هى الحكومة بتمشى ورا الأشاعات

أشاعات

أنت باين عليك عبيط

أنا لغاية دلوقتى مش عارف انا عبيط ولا الحكومة بتمشى ورا الأشاعات وخصوصاً وهم ما عرفوش يمسكه متلبس.......................

صباح الخير ياجارى.................................فتوح عسل

فتوح عسل

أسمه كدة

طبعاً مش اسمه الحقيقى

لكن مرادف لأسمه

فتوح رجل غنى بشدة ويملك فيلا أعلى العمارة على الروف أى السطوح بالبلدى

ولكن سطوحنا مش اى سطوح

تشوف منه حركة الملاحة فى قناة السويس

وتابع منه خروج ودخول المراكب على أرصفة الميناء

وتتابع منه حالة الطقس على مدينة السويس

وترى منه أحلى مناظر الشروق والغروب مع منظر لجبال الجلالة البحرية وعتاقة

حاجة كدة يدفع فيها فلوس علشان تتشاف

فتوح يملك مكتب للشيف شيندرلليخوت..............يعنى خدمة ملاحية لليخوت

حاجة كدة بتاع 5-6 مليون جنيه

ولكنه رجل يموت فى المشاكل ويعشقها.........حدث مرة أن حرقت شقة بالعمارة فما كان منه أن أرسل برقية شكر للمحافظ ومدير الأمن ومدير الدفاع المدنى.........أشكركم على المجهود الخارق لأطفاء الحريق.........مع العلم أنهم كالعادة لم يفعلوا شئ غير ان جنود المطافى سرقوا الشقق وغرقونا مية بعد ما كنا طفينا الحريقة بمعرفتنا وبعد ان أتت على الشقة بأكملها

المهم

وأستكمالاً للبرقية.........ونحب ان ننوه على مراجعة وسائل الأمان لأطفاء الحريق فى العمارة

كل ده مافيهوش حاجة

لكن اللى حصل واللى لازم نكون متوقعينه

أن الحكومة مش ناوية تسيب حد فى حاله

هجوم من خبراء الدفاع المدنى على العمارة ومطالب بتركيب وسائل أطفاء حريق ومستلزماتها بحوالى 50 ألف جنيه وقضية لمأمور الأتحاد .............

ياعم وأنت مالك

لا ده الصح...................محدش قدر فينا يفتح بقه

وتدبسنا فى حوالى 20 ألف جنيه بعد رأفت خبراء الدفاع المدنى بنا والرأفة لم تكن مجانية

المهم بقى فى الموضوع

أن فتوح بك عسل رفض رفضاً قاطعاً المشاركة فى تكاليف تركيب وسائل الأطفاء وأفتعل مشكلة أخرى مع مأمور الأتحاد للهروب من الدفع...................

بل ورفع عليه قضية سب وقذف بالرغم ن أن المأمور لم يوجه له أى أساءة

أراه صاعد معى فى الأسانسير وهو يوجه لى كل تحية وأحترام وأبادله التحية والتقدير

لكنى لا استطيع أمنع نفسى من السخرية الداخلية من تصرفاته وأن لم أشترك قط فى أى أحاديث نميمة عنه

ولكن من أكثر المواقف أضحاكاً..........

تعود بائع العرقسوس المرور صيفاً فى ساعات العصر

تريلن تريلن...............

فتوح بك لا يستطيع نوم الظهيرة....................نادى على بائع العرقسوس فى يوم

تعال يابنى........صعد الرجل إلى فتوح بكو هو يمنى نفسه ببيعة .........القدرة دى فيها عرقسوس بكام؟؟؟؟فتوح سأله....بعشرين جنيه

طيب خد العشرين جنيه وأمشى من هنا

ومر يومان وعاد بائع العرقسوس................تريلن تريلن...............

نادى فتوح بائع العرقسوس مرة أخرى............صعد وهو يمنى نفسه بعشرين جنيه أخرى

هات القدرة دى كدة...ده فتوح بيقوله......الرجل كان فى منتهى السعادة وهو يظن أن اللعبة بقت فيها 50 جنيه .........................دب..........طش

أنزل يابن....................هات قدرتك من الشارع ولو شوفتك تانى ح أوديك للبوليس.............